Zindagi…
Ek ajeeb si kitaab hai ye zindagi
Har din ek naya panna jud jata hai
Har din kuch likhta hai to kuch mit jata hai
Anginat pal hai likhne k liye
Magar na jane kyu syahi hi kam pad jati hai
Har panne pe ek nayi daastan likhi jati hai
Har panne ko ek naya rang diya jata hai
Kabhi khushiyo k rang se ranga jata hai
To kabhi dukho k kaalikh bhi likhna padta hai
Ginti ki ek hi kitaab hoti hai
Magar na jane kyu aur kitaabo ki khwahish rehti hai
Khushi ki ek choti si boond se bhi poora panna rang sakta hai
Magar na jane kyu anek rango ki chah mein kuch panne khali reh jate hai
Sabhi panne ek hi samaan hai
Sabhi rang ek hi samaan hai
To fir kyu is kitaab ko dene wale se hum yahi chahte hai
Ki sirf rangeen panne hi dena, kaale kisi aur ko dena
Har kisi ko apni syahi kaali aur dusro ki rangeen lagti hai
Magar kabhi unki kitaab kholo
To utne hi kale aur rangeen panne dikhte hai
Kis panne pe kaunsi syahi se likha jayega
Ye sirf kitaab banane wale ko pata hai
Lekin agar har panne ko samaan drishti se dekhe
To kya pata kab kaalikh halki ho jaye aur rang aur gehre ho jaye
Is syahi ka bhi ajeeb hisaab hai
Baatane se kaalikh kam hoti hai to rangeen aur badh jati hai
Yeh kitaab har us kitaab ki tarah hai jo aage padhi jati hai
Panne piche palatne se kaalikh kam nahi ho jati
Magar aage bhadne se ek khali panne ko rangeen banaya ja sakta hai
Jab Kitaab ka ant bhi wahi hona hai jaha se shuruat hui thi
To kyu na har panne ko ek alag rang se ilkha jaye
To kyu na adhik rango ki khoj mein panne khali rakhne se achha
Ek hi rang se us panne pe kuch to likhe
Jisne bhi syahi rehte hue ise nahi samjha
Uski kitab adhoori reh jati hai
Magar jise ye kahani samajh mein aa gayi
Uski kitab band hone k baad bhi padhi jati hai 